E por bay subi: Comerciante waak bo budget di overtime

19 di December 2022

Siman cu a pasa gobierno a anuncia cu e sueldo mínimo lo subi entrante 1 di Januari 2023 cu 4.3%. Mi tin e impresion cu pa hopi persona of compania e noticia aki ta mustra irrelevante paso sea e persona ta bisa 

“mi no ta gana sueldo mínimo anyway dus ami no lo hanja e aumento” 

of den e caso di compania nan ta bisa 

“nos ta paga mas halto cu sueldo mínimo dus pa nos e no ta conta” 

E realidad ta cu e subida aki ta impacta hopi mas cu hopi ta pensa. Pa empresanan e por hiba nan un subida di gasto di overtime no planea of sin cu esaki ta genera extra entrada pa e compania. Den e columna LEGAL di e siman aki lo mi splica di con.

E ley di sueldo minimo

E ley aki ta stipula entre otro cu gobierno tin e prerogativo di ajusta/subi e sueldo minimo. Segun e ley esaki tin un procedura cu mester wordo sigui, e mester wordo introduci na comienso di e aña, teniendo cuenta cu e aumento di costo di bida segun C.B.S. y tambe e ley ta bisa cu e suma despues mester wordo afgerond pa asina e caba of cu un multiple di 5 cent, o sea of na “0” of na  “5”. Por ehempel Afl. 1.835.10 of Afl. 1.835,15 y no Afl. 1.835.13. Historicamente kisas no ta semper a cumpli cu e requisitonan aki, pero esey no ta nada nobo y pa e columna di e siman aki no relevante.

Cu e ley aki en todo caso Aruba tin un mechanismo legal pa zorg cu tur hende cu traha ta gana un sueldo minimo stipula pa ley u cu esaki por word ajusta segun tempo ta pasa pa asina esaki no cai atras pa motion di inflacion. Awe aina nos por lesa cu hasta na cierto paisnan manera Merca no ta tur estado tin un ley asina. Algo cu kisas pa nos ta zoina straño. En todo caso esey ta e ley riba papel, si esaki ta asina di berdad den practica ta difícil pa bisa. Esaki por ta un area mas unda nos ta wak cu e control no ta optimal y hendenan ta haci lo cual nan kier i no ta worry mucho cu lo cual ley ta bisa.

E aumento

Segun e anuncio haci e sueldo minimo lo subi cu 4.3%. Esaki lo causa cu e sueldo minimo (nobo)  e entrante 1 di januari 2023 lo bira Afl. 1,893.41. Aki nos por mira unda e cifra aki lo mester wordo afgerond na Afl. 1.893.40. 

E ley di overtime

E enfoke di e columna di awe tin di haber cu e ley di overtime. Di con? Paso den e ley aki ta stipula cu esnan cu pa ley tin derecho riba pago di overtime ta esnan cu ta gana te cu 2.5 biaha e sueldo mínimo. Awor kiko esun tin di haber cu otro of dicon e cifra magico di 2.5 no ta wordo menciona den e ley. E ta parce cu a busca un factor cu ta facil pa calcula y cu ta mustra razonable. Si ta tempo kisas pa reevalua esaki mirando desaroyonan di e ultimo decadanan.

Overtime awe

En todo caso a base di e sueldo minimo actual e grens di overtime si of no ta na Afl. 1,815.35 x 2.5 = Afl. 4,538.38. Esaki kier men cu tur hende cu ta gana e suma aki of menos pa luna tin derecho di cobra overtime ora nan surpasa nan oranan normal di trabou. Si acaso esaki no a wordo controla bon den pasado e trahador ta mantene un claim pa e pago di e overtime aki pa un periodo di 5 aña riba e compania.

Overtime entrante 1 di january 2023

E cambio cu ta bin entrante 1 di january 2023 lo ta Afl. 1,893.41 x 2.5 = Afl. 4,733,53. Esaki lo ta un subida di Afl. 195.15 pa luna. Esaki por trece cu ne cu e grupo di trahador den un compania cu ta bin den remarks lle pa cobra overtime bira más grandi. Esaki ta trece cu ne mas gasto pa e compania of en todo caso ta crea un claim latente contra e compania. 

Como empresario esaki ta impacta bo empresa paso e ta subi e gasto di personal sin cu tin un entrada extra cu ta wordo genera contra esaki. Algo cu no ta mucho leuk. Nos por haci e pregunta di con e aumento di sueldo mínimo riba su mes cu den e caso aki cu ta menos cu Afl. 50 tin e potencial di subi e gasto di payroll di un compania den un forma asina significante? Kiko ta e logica di esaki? Si esaki ta justo of no? Pero na Latin tin e dicho: “Lex dura, est lex”. Cu kier men cu un ley por ta duro, pero e ta keda ley y como tal mester deal cu ne.

Y awor ki haci?

Comercinate awor kisas ta un bon momento pa wak bo payroll di cerca y wak si y con hopi e cambio aki po afectabo e aña cu ta bin.  Na mes momento kisas ta un bon memento pa wak si internamente ajustenan or ta necesario of deseable pa asina maneja e desaroyo aki pa asina minimaliza e impacto riba bo organisacion. Tambe teniendo cuenta cu tur e cambionan fiscal cu lo drenta na vigor incluyendo e aumento di BBO. Bo tin bo contractan laboral na ordo? Nan wordo adapta pa cumpli cu  e codigo civil nobo? Bo reglanan di cas ta deposita na corte? Bo ta tumando maximo ventaja di lo cual ley ta permitibo? Si bo tin duda kisas ta memento pa tuma contacto cu #BoAbogadoFaborito pa wak e co ey.