Pone e ser keri bou di curatela. Con esey ta bai?

Un biaha na trabou m’a haya un yamada di un conoci di mi tata. Despues di a saluda el a puntra si por a dun’e un man pa kita e firma di su casa. El a pone mi pensa un rato y kisas door di mi silencio el a dicidi di splica mi un poco mas. E ora m’a realisa cu locual e kier ta pone su casa bou di curatela. Ey nos ta comproba cu nos nunca ta stop di siña. Den e caso aki m’a siñ’e, of na un manera crioyo di splica, un procedura legal.

Nos a sigui nos combersacion anto mi a splic’e cu si mi por yud’e pero nos mester mira prome si e casa ta cumpli cu e rekisito pa pone bou di curatela of pa kita su firma. M’a splic’e cu tin 2 base pa esaki. Esun mas comun ta e situacion ora cu e persona ta den un estado mental cu ta pone cu su mente ta faya den un forma continuo of cu e mente ta faya rato rato y cu esaki ta trece cu ne cu e persona no por atende su asuntonan den un forma responsabel mas. 

Den boca di pueblo nan sa bisa cu e no ta cien cien (mas). Hopi kisas a maak mee casonan di demencia y por mira con pocopoco e mente di e ser keri ta bay laga. Doloroso te hasta ora un yiu mester tende e pregunta di Pai of Mai: “pero ta ken bo ta atrobe?”. 

Como cu esaki ta un condicion medico pero tambe door di cu e curatela ta un medida drastico, ora di yega corte un hues lo analisa bon si di berdad e persona a bay asina atras cu ta hustifica e curatela. Ora di cuminsa e caso tipicamente nos ta haya un carta firma di un dokter di cas of di u psikiatra cu ta confirma e deficiencia mental y e grado di esaki. Asina mes, cu e carta den file, un hues lo haci pregunta na e persona mes pa determina si berdad e mester duna e orden di curatela. Contrario na casonan comercial cu mi ta atende e casonan aki ta bin cu su dosis dei emocionan cu nan. No solamente pa e famia pero tambe pa mi mes como abogado, vooral si ta trata di un hende cu mi a conoce ora mi tabata mas jong of hasta mucha.

Den cierto caso e por ta evidente pero mi a yega di maak mee tambe cu net e preguntanan haci e persona por a contesta bon cu a pone nos den sala hasta duda pa un momento. Pero pa ora nos a sali e persona no tawata ni corda mas cu e tawata cerca un hues.

Asina cu hues dicta y pone e persona bou di curatela, e hues ta nombra un hende pa keda encarga cu e interesnan di e persona. E persona aki ta carga e título di curator. Un di e prome cosnan cu mester haci a base di ley ta publica un anuncio den por lo menos 2 corant local y den e Landscourant mencionando e sentencia, cu ta contene nomber di e persona y nomber di e curator. Cu esaki comunidad ta legalmente informa y por tene cuenta cu no por deal cu e persona direct. Si un hende haci esaki toch despues di e fecha aki e curator por cay aden y draai e cos bek. 

E curator tambe lo mester atende cu banco pa “kita e firma” na banco y regla cu e pensioenfonds si esey ta aplicabel. Awor e curator ta keda cu e obligacion pa raporta y informa corte. Corte di e forma ey tambe por controla e curator pa garantisa cu e no ta neglisha su responsabilidadnan.

Tene cuenta cu ademas di e control di corte, e curator su poder ta limita na maneha e asuntonan di e persona. Pa e por deshaci of bende bienes di e persona, e curator mester bay bek corte pa pidi permiso. Si ta trata di un cas of tereno, e curator no por bende e cas sin permiso di corte. Sin esaki e notario no lo coopera cu e traspaso di e cas. 

Pero di con? E ta bon toch?

Pero tur esaki ta make sense? Ami ta haya cu si, pasobra esaki ta un forma di proteha esunnan vulnerabel den comunidad cu ta sufri di un enfermedad mental. Ehempel tin hopi. E persona cu ta bay banco lanta placa y no ta corda ki e haci cu ne, semper lo haya un hende pa probecha di e situacion y uza su placa. Esun cu ta probecha di un persona door di “cumpra” un auto of otro obheto di balor pa un prijs ridiculamente abou, sabiendo cu e ta probecha di e enfermedad mental di e persona. 

P’esey ta bon pa proteha e personanan aki door di apunta un curator. Los di esaki obvio e cuido di e persona ta keda importante. Factornan manera cuminda, cuido diario, cuido medico y un ambiente di biba sano ta aspectonan cu no mester falta.

Tin biaha kisas tin hende ta pensa cu e curatela ta berguensa y pesey nan no ta cuminsa e proceso. Pero esaki kisas no ta den interes di e persona en cuestion mes. Si bo ta ripara cu e estado di salud mental ta cuminsa bay atras, consulta cu un dokter y si yega asina leu, contact mi pa cualkier pregunta of pa asistencia. https://www.facebook.com/gomezcoffie