OPINION:

Curioso ta cu cierto politiconan awor ta brasa e opinión di un político y un academico Hulandes. Riba su mes cada ken por kies pa sigui e pensamento di un of otro persona. E hecho ta keda si cu e ta un politico,  cu ta den Eerste Kamer y cu tin un background academico pero esaki no ta trece cu ne cu e persona aki na e momento aki por cambia e pensamento no di Eerste Kamer, ni di Tweede Kamer y no di Gobierno Hulandes. Cu un of mas politico local ripiti su palabranan manera un lora no ta cambia e realidad pa Aruba. Por lo tanto mi no ta wak e valor agrega di ripiti e palabranan aki.

Nos no mester lubida cu e placa cu a salba Aruba ta bin di e pagado di belasting Hulandes y esaki kier wak e placa ey bin bek. 

• Haña un prestamo riba e mercado internacional kisas por pero ki ta pasa ora e banco stranjero tambe pone condicion? 
• Kisas pidi garantia den forma di shares di companianan estatal? 
• Multa si no cumpli cu prosupuesto? Pero mas importante ta cu Aruba mester pa Reino (RMR) duna permiso pa Aruba mag presta placa riba mercado internacional. Y si Reino nenga? 
• Y si Reino bai di acuerdo mes?  E interes lo no llega e interes rond di 3% cu Gobierno di Aruba a nenga of cu Gobierno di Aruba a scoje pa no acepta.

Berdad 6.9% no ta un interes abou. Pero di otro banda ultimo tempo Aruba tawata fia na rond 5.7%, 5.8% y te hasta 6.5%. Den pasado prestamo na pais Aruba incluyendo di banco stranjero a llega 9.35% y di banco local 9.5%. Un fiansa di mas cu US$ 200 millon a bai na 6.5%. E fiansanan y e interesnan ey no a wordo stipula ni imponi door di Hulanda. Gobierno a dicidi cu e interes ey tawata bon pa Aruba! Si 6.5% no tawata bon mi no por imagina cu a acepta esey of cu no a crtica e 6.5%. Si wak e ley pa autoriza e prestamo di 6% y 6.5% rina un suma di Afl. 180 miyon esey a bai na costo di un comision di 0.0625%. O sea esnan cu a zorg pa e placa aki a gana mas di Afl. 1 miyon na commision. Ni 6 luna pasa Gobierno a bai di acuerdo pa fia mas cu Afl. 400 miyon na un interes maximo di 6.5%. Aki lo paga un commission di mas cu Afl. 2.5 miyon.

Mirando esaki por haci e pregunta si e politiconan ta honesto y transparente cu nos. Pa kiko aña pasa no a grita bisa cu e interés di 6% y 6.5% ta excesivo? Pa kiko mester busca otro alternativa pa 6.9% si recien a haña cu 6.5% ta un bon interés? Cu otro palabra pa pais Aruba cu su ranking di credito 6.9% no ta parce disproportional. Mare e por tawata mita di esey. Nos lo spaar hopi placa mes.

Echt ta pensa cu un tercero cu ta depende di un permiso di Reino lo bai fia Aruba placa más abou cu 6% of 6.5%. Mester tene cuenta tambe cu ora bo kibra un areglo a largo plazo of paga e Afl. 916 miyon den un tiro financia cu un otro debe cu no ta bin un penalidad paso bo ta page trempan. E ora mester calcula e beneficio y di in refinanciamento no solamente cu e interés más abou pero tambe e “breakage fee”. Un tiki common sense por llega basta leuw. Pa esaki nos mester di ta un professor. Aunke hopi di nos tin más preparacion cu cierto di e politiconan cu ta ripiti e plabaranan di e politico di Eerste Kamer. 

No mester Libia cu esun cu ta debe, tin poco di exiji y cu di mes ta den in situación zwak pa (sigui) negocia of explora alternativa.