Columna LEGAL: Tasa di Interes pa Aruba Segun un Minister, casi bon….

Un conoci a comparti cu mi e comunicado di prensa di un minister  como su comentario riba e columa LEGAL cu e titulo: “6.9% Loan for Aruba, excessive? Aruba’s Interest Rates: A Historical Perspective”, publica den www.Trempan.com y traduci door di y publica riba www.24ora.com cu e titulo: 𝘛𝘢𝘴𝘢 𝘥𝘪 𝘪𝘯𝘵𝘦𝘳𝘦𝘴 𝘱𝘢 𝘈𝘳𝘶𝘣𝘢: 𝘶𝘯 𝘱𝘦𝘳𝘴𝘱𝘦𝘤𝘵𝘪𝘷𝘢 𝘩𝘪𝘴𝘵𝘰𝘳𝘪𝘤𝘰. Si no ta pa e conoci, lo mi no a wak e comentario mes. 

Den su comentario e minister no ta representa e echonan totalmente corecto. Ademas, e ta haci algun insinuacion den mi direccion. E ultimo aki ta un tipico modus operandi di hopi politico. Focus riba e persona y no riba echo of argumentonan. Pero enfin. Mi no mester di ta un experto financiero pa uza logica, haci investigacion, scucha di esnan cu si ta den e materia pa mi por yega na cierto conclusion. Un minister lo haci bon di sigui e modelo aki. 

Ta conoci cu tur prestamo y tambe esnan di pais Aruba riba e mercado internacional na fin di dia ta un acuerdo (“leningsovereenkomst”). Pa esaki por materialisa, mester tin un oferta door di un partido, den e caso aki e instituto financiero stranhero y e aceptacion door di Pais Aruba. Por lo tanto e minister no por bisa cu no tin aceptacion of cu no ta djis acepta e interes. Cu e minister no tin choice di acepta, kisas ta otro cos. Tambe ta haci referencia cu e interes ta resultado di un subasta y no di kisas e forma cu ami a menciona. Den un subasta tambe tin un of mas partido cu ta ofrece y un of mas cu ta participa mester acepta. Sin aceptacion, lo no por formalisa un acuerdo di prestamo. 

Pero e informacion duna door di e minister no ta completo! Si acaso kier a educa comunidad, el a keda sin bisa cu ora di refinancia debe na US$ esaki generalmente ta inclui bishita y presentacionnan financiero na insititutonan financiero na Merca manera fondonan di pensioen cu ta cumpra un of otro parti di e debe of cu ta paga e debe y tum’e over. Aki e disciplina financiero di Pais Aruba of falta di esaki ta hunga un rol riba e interes cu e fondo di pensioen aki ta dispuesto di duna. Tambe otro factornan manera e rating financiero di Pais Aruba. 

Den e siguiente buelta of biaha cu bay haci esaki e echo cu Aruba awor tin un interes di 6.9% pa 20 aña largo pa paga Hulanda, lo influencia e interes aki. E fondonan probablemente lo exigi e mes of mas cu e 6.9%. E minister lo yama esey excesivo, abusivo of e lo bisa ta mercado internacional?

Otro factornan cu lo por hunga un rol ta cu no tin acuerdo cu Hulanda – a pesar di a “negosha” masha hopi mes y cu pa fin di aña lo no tin base legal mas pa CAft door cu e protocol ta termina na december 2023. No por keda sin menciona tampoco cu gobierno tin un atraso enorme den presenta su relato financiero ta pone cu e riesgo di Pais Aruba ta mas halto cu ta traduci su mes den interes mas halto. Den sector priva un ehecutivo no tin e luho di presenta relato financiero añanan despues. 

Locual Pais Aruba no por controla ta e nivel di e LIBOR (of e SOFR) of e porcentahe cu e US Treasury bills ta paga. Actualmente tur dos ta rond di 5%. Esaki kiermen cu ningun fondo financiero lo duna Aruba un interes di 5% of 5.5% si nan por haya esey na Merca mes. 

Aruba su premium, m’a compronde historicamente ta rond 1.5% pa 1.75%. O sea, e  interes potencial lo ta hopi cerca di 6.9% di Hulanda. Hera mas! Sin conta cu actual, segun rapport di Banco Central, awor caba tin fiansa cera na LIBOR plus 4.5%. Awe un interes asina lo ta rond di 9.5%!!

Algun conocedo di e materia ta hasta papia di possible premiums cu ta (hopi) mas cu esey. E consecuencia pa nos ta cu nos debe cu lo wordo refinancia lo carga un interes mas halto. No mester pensa cu e fondonan aki no sa precies kico ta pasa aki na Aruba, pasobra nan tin cu representa e interes di nan pensionadonan, aseguradonan of nan accionistanan. Nan sa bon bon con e situacion di y na Aruba ta. Nan sa cu tin un escases di governance y accountability di parti di gobierno. Ta facil pa e minister bisa, por ehempel, cu (lo) tin un surplus pero esaki lo wordo constata aki un paar di aña, dia e relato financiero audita door di un register accountant keda cla. Pa e tempo ey e minister no tey mas! Esaki sigur ta un beneficio pa e politico. Cu Aruba a corto plazo lo por refinancia e debe di Afl. 960 miyon no ta probabel. Segun rapport di Banco Central, tin mas of menos US$ 650 miyon na debe cu lo madura entre awor cu 2024. Tur inidacion ta cu esaki tambe lo bay na un interes cerca di of cu ta surpasa e 6.9% cu nos tin awo. Si e yega of pasa 7% esey no lo ta Aruba su “lucky seven”. Entre e dos grupo di debe aki so nos tin mas cu 1 biyon di Dollar na debe pa refinancia. Placa cu no por wordo saca for di e mercado local, sin canabalisa e reservanan di divisas. E suma aki ta preocupante!

Finalmente, mester remarca cu sin aprobacion di Hulanda, pais Aruba no por fia placa den exterior y cu na final di dia ta e forsa financiero y e credibilidad financiero di Hulanda ta locual ta haci cu Aruba por fia. No necesariamente pasobra tin confiansa den e minister. Pais Aruba mes no tin suficiente collateral pa duna pa back up un debe total di casi 6 biyon. Compara esaki cu e escenario cu e hoben cu ta haya un fiansa na banco pasobra papa of mama ta para borg, riba su mes e lo no a haya e placa fia.

Pa locual ta e insinuacionnan personal cu e minister a haci den direccion di mi persona, mi ta laganan pa su cuenta y sigur no lo bay over di contesta den un forma similar. Mi a wordo lanta miho cu esey. Pero ta bon si pa e minister no confundi esaki cu debilidad. 

#BoColumnistaFaborito #BoAbogadoFaborito